ಭಾವ ತಿಜೋರಿಯ ಬೀಗದ ಕೈ ಮತ್ತು ನಾನು

ತುಂಬ ದಿನಗಳ ಹಿಂದೆ
ತುಂಬ ಭಾವುಕನಾಗಿದ್ದೆ
ಆಗ ಅದೇ ಸರಿ ಅನ್ನಿಸಿತ್ತು
ಯಾಕಂದ್ರೆ, ಬದುಕು ತನ್ನ ಮುಖವನ್ನು ಅಷ್ಟೇ ತೋರಿಸಿತ್ತು

ಕೆಲವು ದಿನಗಳ ಹಿಂದೆ
ಭಾವುಕತೆ ಅರ್ಧದಷ್ಟಾಗಿತ್ತು
ಆಗ ಅದೇ ಸರಿ ಅನ್ನಿಸಿತ್ತು
ಯಾಕಂದ್ರೆ, ಬದುಕು ತನ್ನ ಮುಖವನ್ನು ಅಷ್ಟಷ್ಟೇ ತೋರಿಸತೊಡಗಿತ್ತು

ಇತ್ತೀಚಿನ ದಿನಗಳಲ್ಲಿ
ನಂಗೆ ಯಾವುದಕ್ಕೂ ಅಳುವೇ ಬರ್ತಿಲ್ಲ
ಯಾವುದಕ್ಕೂ ಖುಷಿಯೇ ಆಗ್ತಿಲ್ಲ
ಯಾವುದಕ್ಕೂ ವಿಷಾದ ಆಗ್ತಿಲ್ಲ

ಅಯ್ಯೋ, ಇದೇನಾಗಿಹೋಯ್ತು ನಂಗೆ?
ಅಂತ ತುಂಬ ತಲೆ ಕೆಡಿಸಿಕೊಂಡೆ
ಹೊಳೀಲಿಲ್ಲ, ಕೊನೆಗೆ ಥಟ್ಟನೆ ನೆನಪಾಯ್ತು
ಭಾವ ತಿಜೋರಿಯ ಬೀಗದ ಕೈ ಕಳೆದುಹೋಗಿದ್ದು!